Prólogo de Xuan Xose Sánchez Vicente


PROLOGO  (II)

Don Feliciano Robles Blanco ye un inxenieru técnicu que se dedica dende hai tiempu a recopilar y asoleyar dixitalmente la vida y obres de persones ilustres. La forma d’engaviellar responde a dos parámetros estremaos y coincidentes parcial o dafechamente en cada fexe de biografíes: profesión, arte o actividá, d’un llau; llugar de residencia o nacencia, d’otru. Asina, por exemplu, les enciclopedies dixitales de «Ingenieros sevillanos ilustres» o «Mujeres ilustres de Extremadura». Esa actividá, digamos, de collecha biográfica dixital, non ye la so única xera: si ustedes restrexen per interné verán otros estudios y preocupaciones de la so persona.
Pues bien, la so mirada empobinóse hacia Asturies nos caberos tiempos y regalónos de recién dos acollechamientos biográfico-históricos, Asturianos ilustres.
Hai que sopelexar bien al alto la lleva que don Feliciano fai’l so trabayu de forma altruista, amás d’entusiástica, y que ye’l so amor a la historia y a la cultura lo qu’afala la so actividá.
Acasu nun taría por demás recordar equí l’acuñación cola que Xovellanos quería resumir l’empeñu del so Instititu de Náutica y Mineraloxía, «Quid verum, quid utile», «A la verdad y la utilidad públicas»; daqué d’ello podía decise de los trabayos de don Feliciano, que tán, además, sometíos a revisión y ampliación constante.
La primera d’eses gavielles, Asturianos ilustres, contién nesti momentu cuarenta y cuatro biografíes (hasta fai un migayín, cuarenta y dos) d’andes estremaes de l’actividá humana: filólogos, xeógrafos, filósofos, lliteratos, periodistes, poetes, relixosos. D’otra miente, los personaxes reseñaos van de dalgunos del sieglu XVIII a los de güei, masque predominen los de les últimes dómines.
Naturalmente, tolos criterios d’enxertamientu nuna obra como esta son discutibles: a lo meyor caún de nós echa en falta dalgunes presencies, agora bien non ye discutible la presencia de los que tán, salvo acasu la del qu’esto firma.
Nun me queda otro que volver da-y les gracies a don Feliciano Robles Blanco pol so trabayu, el so entusiasmu y la so xenerosidá, y desear qu’esta enciclopedia dixital-yos sirva a ustedes pa la so información y el conocimientu de la nuestra cultura.

Xuan Xosé Sánchez Vicente


Volver al índice


No hay comentarios:

Publicar un comentario

Asturias Paraíso Natural

ABELARDO MARGOLLES BARROS

  Abelardo Margolles Barros, Doctor en Farmacia, profesor e investigador. Nació en Villaviciosa (Asturias) en 1968 Familia, Formación. D...